وش اللي يعذرني من الربع والميقاف
وانا شاعرن تجري حميّاهـ مع دمّــه

ليا قامت صفوف التحدّي وحمي القاف
يضحّي بروحه دون ماقف بني عمّــه
ًفواز السعيدي

ودام انهم في خير انا ماعلي خلاف
وبيرق هذيل العز يطرخ على القمه

وارحب وانا في ماقفي والثقال اخفاف
هلا مرحبا ترحيب تبرا به الذمه
حامد القارحي

في حلة هل الافعال من ماضي الاسلاف
عيال الزعيم اللي جلا عرفه الغمه

منيع الله احزام الظفر فزعة المختاف
وللمرجلة منصى وللمعرفة يمه
احمد مرزوق

رحل مير في عيون الفخر حاضر وينشاف
ولا ينقصر حبل السواني عن الجمه

شداد الفخر مع نايف وشاكر ونواف
ومع بندر ورايد وابونايف يتمه
منصور الرياحي

والاد العميري للقبيلة ذرى و لحاف
مهمين ورواة التواريخ مهتمه

مجالسهم اكبر مدرسة ( عرف ) للعراف
قبل يكشف الإعلام عن ( مجلس الأمه )
معتق العياضي

بيوت العوارف مصدر العدل والإنصاف
ليا نشفت الارياق والناس ملتمة

من ايام ساحات الوغى والسيوف رهاف
و من يزبن الاد العميري جلوا همه
وصل العطياني

قبيلة فخر يطرخ علمها على المشراف
تعين الضعيف وتردع اللي معه زمة

هذيل العروبة هيبة الحد والاطراف
يعلمك عن تاريخهم لابس العمة
ابراهيم الشيخي

هل الفعل واهل المجد والسلم ولاعراف
قبيله فخر تاريخهم ماحداً ذمه

تزيد الشموخ شموخ وتفرق الاحلاف
ومن يعترض لهذيل تبكي عليه امه
صقر سليم

لهم مجد متكامل ومترامي الاطراف
يحط اكثر امجاد الرياجيل في كمه

يدين الهذيلي تصرف اكثر من الصراف
لو انه .. تولى مال قارون مالمه
مرهب البقمي