يالله يلي كلنا نومن بدينه
أربعمية عام والف ولا نزالي
من تعينه لو حمل حملة سفينه
مايحوفه لا اهتزاز ولا هزالي
صحتى هذا السنه ماهي بزينه
فيه غازي كل شهرين ايغزالي
والقدر ماهو بحاين قبل حينه
ليلة أفراحي ماهي ليلة عزالي
البلا من هاجسي صابه قرينه
عقب قوة ولفنا سار انعزالي
شين نفس وقل ود وثقل طينه
مير انا استاهل. وما سوا جزا لي
لي سنه مضفي على عرشه سكينه
لأخذ إعلومه ولا أعلنت اعتزالي
غير اباراضيه واقبل جبينه
وانقدوني كان اوردها هزالي
في رضا شيخا تصافحني يمينه
بالوفا والطيب وعلومه جزالي
قدر ابو معتز مطلق شوق عينه
اعتزي له وان تعزويت اعتزالي

مبروك ياخالد ومن منبرك أذيع
شعري وبن هضبان صوته يشلعه
في سته وعشرين من ثاني ربيع
شيخا دعا يوم اربعا شهر اربعه
وارسا عمد حفله على جرهد وسيع
وانوار صيوانه تشعشع شعشعه
في وجه ديرتنا نحى الخط السريع
صوت التحايا كل مقبل يسمعه
حياكم الله عد همال الربيع
وصدورنا مركاظ خيل من السعه
في حفل شيخا في الزعامه مستطيع
عزمه على العلم المجمل يدفعه
مطلق مواقيفه على الساق المنيع
مقدم عرب ماهو كلاله وامعه
والشيخ ابو خالد ذرا الحصن النزيع
محزم ظفر ماهو بمنزوع الدعه
جيناتهم جينات مبروك الشجيع
شيخا عليه الحجر ينظح مدمعه
ابن فليفل حد شامان البريع
راس الخطا عن روس ربعه يقطعه
وان عالت العيال ماذب القريع
الا اعتزا واقبل وشمر ذرعه
وبن حسين الخال حامي كل ريع
علي ليا من عال خصمه يردعه
يالله عساهم صحبة اصحاب البقيع
يلقون بيبان الجنان مشرعه
والعز حي ولا يموت ولا يضيع
بيرق ذوي عبد الكريم وترفعه
وألاد محسن بيرق الطاله جميع
من حيث ماحل الفخر حلو معه
اهل أشهب البارود والسهم الشنيع
يوم الزمن معرك حروب ومعمعه
والقرح القرح هل الشان الرفيع
لأحل طاريها حجاجك ترفعه
حرابها زاده طعاما من ضريع
دخيلها تاسم عصاه وتنزعه
وهذيل هل تاريخ مرجع للجميع
وأمجادها ماهي هبيد وجعجعة
صبحي القارحي