لا تستر الليل والقمرا عن السهران
خل السهارى تموت اشوي وتحيا بك
ليل طويلٍ يداعب طرفك النعسان
معذور ذاك الحرير اللي تلوى بك
جمرك رماده عسل ياسيد الخلان
من عشت في روضتك وأنا أتغنى بك
عطيتني الورد يالمحبوب والريحان
وصرت لي سيدٍ أقرأ من كتابك
علمتني الحب كيف العب في هالميدان
علمتني كيف أشوف الصبح لي جابك
الأرض يا صاحبي والسقف والجدران
أستأنست لك وكل البيت هلا بك
خلك هنيا ترى حنا غدينا أخوان
اللي تبي يا صالك وأنته على بابك
نضيفك لين شافك همل الضيفان
والله مالي حياةٍ زينه إلا بك