Arrangiamento e direzione d'orchestra Rino Alfieri, Villa Rufolo, Ravello Festival
Lu Guarracino, di anonimo, 1700
Lu Guarracino che jeva pe mare
lle venne voglia de se ‘nzorare.
Se facette ‘nu bello vestito
de scarde de spine pulito pulito,
cu ‘na parrucca tutta ‘ncrifata
de ziarelle ‘mbrasciolata,
cu lu sciabbò, scuollo e puzine
de ponte angrese fino fino.

Cu li cazune de rezze de funno,
scarpe e cazette de pelle de tunno,
e sciammeria e sciammerino
d’aleghe e pile de voje marino,
cu buttune e buttunere
d’uocchie de purpe, secce e fere,
fibbia, spata e schiocche ndurate
de niro de seccia e fele d’achiata.

Ddoje belle cateniglie
de premmone de cunchiglie,
‘nu cappiello aggallonato
de cudarine d’aluzze salate,
tutto posema e steratiello
jeva facenno lu sbafantiello
e girava de cca e de lla
‘a nnammurata pe se truvà!

‘A Sardella a lu balcone
steva sunanno lu calascione;
e, a suono de trumbetta,
jeva cantanno st’arietta:
"E larella ‘o mare e lena
e ‘a figlia d’ ‘a sié Lena…
Ha lassato lu nnammurato
pecché niente ll’ha rialato!".

Lu Guarracino ca la guardaje
de la Sardella se ‘nnammuraje;
se ne jette da ‘na Vavosa,
la cchiù vecchia e maleziosa;
ll’ebbe bona rialata
pe portarle ‘na ‘mmasciata.
La Vavosa, pisse pisse,
chiatto e tunno nce lo disse.

La Sardella ca la sentette
rossa rossa se facette,
pe lu scuorno ca se pigliaje
sotto a ‘nu scuoglio se ‘mpezzaje.
Ma la vecchia de la Vavosa
subbeto disse: Ah, schefenzosa,
de ‘sta manera nun truove partito,
‘ncanna te resta lu marito!

Si haje voglia de t’allocà
tante smorfie nun haje da fà,
e fora le zeze e fora lu scuorno,
anema e core e faccia de cuorno!
Ciò sentenno, la sié Sardella,
s’affacciaje a la fenestella,
e fece n’uocchio a zennariello
a lu speruto nnammoratiello.

Ma la Patella, che steva de posta,
la chiammaje: faccia tosta,
tradetora, sbrevognata,
senza parola, malenata,
ch’avea nchiantato l’Alletterato,
primmo e antico ‘nnamorato.
De carrera da chisto jette
e ogne ccosa le dicette.

Quanno lo ‘ntise lo puveriello
se lo pigliaje Farfariello.
Jette a la casa e s’armaje ‘e rasulo,
se carrecaje comm’ a ‘nu mulo
de scuppette e de spingarde,
porvere, palle, stoppa e scarde.
Quatte pistole e tre bajonette
dint’ a la sacca se mettette.

‘Ncopp’ a li spalle sittanta pistune,
ottanta mbomme e novanta cannune;
e, comm’ ô guappo Pallarino,
jeva truvanno lu Guarracino!
La disgrazia a chisto purtaje
ca ‘mmiezo a la chiazza te lu ‘ncontraje.
Se l’afferra p’ ‘o cruvattino
e po le dice: Ah malandrino!

Tu me lieve la nnammorata
e pigliatella ‘sta mazziata!
Tuffete e taffete, a meliune
le deva paccare e secuzzune,
schiaffe, ponie e perepesse,
scuppulune, fecozze e cunesse,
scerevecchiune e sicutennosse
e ll’ammaccaje osse e pilosse!

Venimmuncenno ca a lu rummore
pariente e amice ascettero fora,
chi cu mazze, cortielle e curtelle,
chi cu spate, spatune e spatelle.
Chiste cu barre e chille cu spite,
chi cu ‘ammennole e chi co ‘antrite,
chi cu tenaglie e chi cu martielle,
chi cu turrune e susamielle.

Pate, figlie, marite e mugliere
s’azzuffajeno comm’ a fere.
A meliune correvano a strisce
de ‘sto partito e de chille li pisce.
Che bediste de sarde e d’alose
de palaje e raje petrose,
sarache, dientece ed achiate,
scurme, tunne e allitterate!

Pisce palummo e piscatrice,
scuorfane, cernie e alice,
mucchie, ricciole, musdee e mazzune,
stelle, aluzze e sturiune,
merluzze, ruongole e murene,
capeduoglie, orche e vallene,
capitune, auglie e arenghe,
ciefere, cuocce, tracene e tenghe.

Treglie, tremmole, trotte e tunne,
feche, cepolle, laure e retunne,
purpe, secce e calamare,
pisce spate e stelle de mare,
pisce palummo e pisce prattielle,
voccadoro e cecenielle,
capechiuovo e guarracine,
cannulicchie, ostreche e angine

Vongole, cocciole e patelle,
piscecane e grancetielle,
marvizze, marmure e vavose,
vope prene, vedove e spose,
spinole, spuonole, sierpe e sarpe,
scauze, nzuoccole e cu li scarpe,
scunciglie, gammere e ragoste,
vennero nfine cu li pposte!

Capitune, saure e anguille,
pisce gruosse e piccerille,
d’ogni cceto e nazione,
tantille, tante, cchiu tante e tantone!
Quante botte, mamma mia,
ca se devano. Arrassusia!
A centenaro li bbarrate!
A meliune le ppetrate!

Muorze e pizzeche a beliune,
a deluvio li secuzzune!
Nun ve dico che bivo fuoco
se faceva per ogne lluoco!
Ttè, ttè, ttè, cca pistulate!
Ttà, ttà, ttà, lla scuppettate!
Ttù, ttù, ttù, cca li pistune!
Bu, bu, bu, lla li cannune!

Ma de cantà so’ già stracquato
e me manca mo lu sciato;
sicchè dateme licienzia,
graziosa e bella audienzia,
nfi’ ca sorchio ‘na meza de seje,
cu salute de luje e de leje,
ca se secca lu cannarone
sbacantànnose lu premmone!