بلكور لجواجله..

بقلم وصوت/ زغاد نصرالدين.. فضلا.. ادعموا صفحتي.. سيروا في الأرض sirou fi el ard

بلكور لجواجله.. بلكور العاصمه.. بلكور كبير الشان..
كواشين طباخين خضارين قهاوي وحفافين في بلكور. . مايكونو غير جواجله. . كيلمعلم كالخدام..

فرنسا لاستعمار كانت تخاف من لعراش نتاع جهة جيجلي المعروفين بدمهم الحار.. كانو غير يكبرو.. تفرقهم وتهجرهم فلبلدان..
وهذا واش صار من عام 1903.. جابت للمينا نتاع دزاير خدامين بزاف من هاذوك لعراش.. وبالخصوص الطاهير لعوانه وزيامة.. وسكنتهم في بلكور بجنب المرسى.. خدمو وعاشو.. وخرج منهم الخباز الصنايعي القهواجي ولحفاف.. على خاطر القاوري مايحففش لانديجان.. وكبرت بلكور وكبرو معاها لجواجله بالعايلات.. وولاو صنايعبة وتجار.. من الحامه لبلوزداد.. ومن المرسى للمقام..

شكون مايعرفش الجواجلة.. نتاع ليهال.. تجار الجملة الخير والبركه.. واللي زادو جابو معاهم جواجله من لبلاد..

لجواجله من بوكري.. عندهم يد فوق لعجين.. ويد فوق السلاح.. وكانو هما الابتلاء نتاع هاذ لاستعمار.. اللي ماحسبش باللي.. هاذ لجواجله راح يولولو في بلكور رواد جمعية العلما ورواد دار الوطنيه ويقدمو شهدا بزاف كما عايلة بوعباش..
وماحسبش باللي ستين سنه من بعد.. ولاد هاذوك لجواجلة االي جابوهم يخدمو فالمينا.. رايحين يخرجو في 11ديسمبر60.. مع باقي الجزايربين الشجعان.. وهما رافدين ل علام.. بيض وخضر نجمة وهلال.. ويطلقو صيحة كبيره من لعقيبه "روحو من بلادنا.. لاستقلال.. لاستقلال"..

والحمد لله.. مابقاش لاستعمار في بلادنا..
وجا لاستقلال.. جابوه هاذوك الرجال.. و جابو الخير لبلكور وكامل لبلاد.. وانزادت الحمرا.. السياربي.. شباب بلوزداد..
الجيجلي خميسه فرحات كان من مؤسسيه لكبار.. وكان من لجواجله المرفهين نتاع بلكور اللي دعمو الفربق بالمال.. مع بودوه و بوهلال.. ومن عامه التاني.. الشباب دار الموسطاش وعام على البطوله والكاس.. يا حسرا على اللاعابه لجواجله.. خدام بوجنون سادات.. عبروق و بوعباش..

السياربي كانت تلعب مع الجيازدي النمرة الجيجلية اللي كانت من لكبار.. والدم كيجبذ.. وولات النمره كيتلعب فالعاصمه.. الجمهور نتاع السياربي يشجعها بلا حساب.. والله يرحم الانصار اللي ماتو.. فلستاد 20 اوت.. كيراب بيهم الحيط.. على خاطر النمره الجيجلية.. كتلعب فلستاد..

سياربي/ جواجله.. باينه للعيان.. الشعبي كيخرج من بلاد سيدي امحمد بوقبرين.. يروح لبلاد سيدي احمد امقران.. بلاد جده مزغيطان..

لجواحله كانو دايما حاضرين
فالشباب.. ادارة والا لاعاب..
بودوه بوكعباش بولكحل وقرباج.. ولاعابه.. بوحليسه ومقراني.. فريخ فنير مكحوت هريدة بوكريه بوقجان..

المرحوم قرباج.. رئيس الشباب.. كان جيجلي فالدم ويحب الجيازدي بزاف..
وتحتمت عليه يجي لجيجل باش يلعب ضد الجيازدي فالكاس.. لجواجلة فرحو بيه ولبسولو الوشاح نتاع النمرة.. وهنا جمهور السياربي حار.. قرباج جيجلي والا بلوزداد.. ولحديث قياس..

بقلم وصوت / زغاد نصرالدين.. فضلا.. ادعموا صفحتي.. سيروا في الارض. .