عيدية عتيبه
كلمات : حمود خلف
اداء : مهنا العتيبي





آلقريحه غابت وجت بعيديه
من بعد غيبة شهر جات مشتاقه

ما ذبحني غير نظراتها فيّه
تستثير النفس والنفس تواقه

اعتزت بي والعزاوي عتيبيه
تقطف مْن الجزل وتقدمه باقه

يا عتيبه يالزحول الكباريه
حي روسٍ لنواميس عشاقه

عزوةٍ مثل النجوم السماويه
مرقبه فالكون وتنور افاقه

كل عام امجادنا نارها حيه
نارنا في قمة المجد شعاقه

نرخص الارواح دون السعوديه
والعدو مدحور ومضَيّق خناقه

عاد عيد الدار والدار محميه
راية التوحيد بالعز خفاقه

والمدايح والبيوت الحماسيه
في رفيع الشان تكتب على فاقه

سوقو لسلطان فنجال بريه
من قنادٍ يبطي اللاش ما ذاقه

بن معزي طيّب الراس والنيه
الكرم والمرجله منبع اعماقه

آلعديم اللي فعوله حماويه
لو يشين الوقت ما شانت اخلاقه

وقفته عند الامور المصيريه
صبحٍ يفج الغطاليس باشراقه

عقّب اللي وقفته شبه جبريه
ما يعرف يوّقف الا على ساقه

والله بعض العرب سيرته سيّه
ابك حتى مدحته تدرق دراقه

يسحب المشلح بخطوات اميريه
كل ما شاف الفلاشات برّاقه

يحسب ان ما فيه مثله ولا زيه
وادري ان ماله على الطايله طاقه

ما رفع قدر البشوت الحساويه
غير روس اللي على الطيب سبّاقه

الكبار اللي ليا كبرت الهيّه
يشفقون لطاري الماقف شفاقه

وابو فيصل كاسب النعم مثنيه
والنعم ماهي من الباب لـ الطاقه

كل ما جوه الرياجيل في ديّه
ابتهج والمال في شانهم ساقه

في حجاجه لـ التباشير ماريّه
سمعته حتى للاجناب شوّاقه

لا تقدّم بالعزوم الرهاويه
لو تحط طويق فالدرب ما عاقه

العصيمي حي وقفاته الحيّه
فارقٍ فالخلق سبحان خلّاقه

شوق عين المرجله والسنافيه
معتلي بالطيب في راس شوهاقه

كل ما ثارت وجاء للفشق فَيّه
ما يعرف الذل راسه وخفّاقه

فوق عرجا والجِفر والرشاويه
صدّر التاريخ فعله وميثاقه