.. علاش أوروبا الصليبية تحقد على جيجل من زمان بعيد.. وواش سر الطاعون اللي ضربها.. وقت حملتها المشؤومة على جيجل عام 1664.. 🇩🇿🇩🇿

بقلم وصوت الباحث/ زغاد نصرالدين.. فضلا .. ادعموا صفحتي.. سيروا في الأرض sirou fi el ard

جويلية 1664.. ملك فرنسا الشاب "لويس 14".. قرر يدير اول حملة كبيرة على الجزاير.. وخير شبه جزيرة جيجري.. جيجل اليوم.. باش يحتلها ويبني قاعدة بحرية متقدمة على المينا ديالها اللي يتوسط الخط البحري بين تونس والجزاير مزغنة.. زعما حب يحمي بوابر التجارة نتاع اوروبا من القراصنة المسلمين..

وزيد الجواجلة اللي دمهم مخلط بدم الموريسكيين الاندلسيين.. كانو ركيزة الاسطول البحري الجزايري المدعوم من العثمانيين.. واللي كان يهاجم بوابر الاوروبيين المعتدين ويحتم عليهم يدفعوا الجزية وهوما صاغرين..

الحقيقة.. "لويس 14" كان طامع فخيرات الحزاير.. وحب يدير عليها حملة صليبية اوؤوبية يكون هو زعيمها.. ويركع الجواجلة وحلفاؤهم العثمانيين المسلمين..

الحملة كانت مدعومة من هولندا وانجلترا.. قادها الأميرال "François de Vendôme" بن عم الملك "لويس14".. و Charles-Felix قاد فرسان الهيكل نتاع مالطا الصليبيين..

مع وصلت الحملة للشط الجيجلي.. الأهالي الموزعين في الأدغال والغابات.. قابلوها بنيران مدفعية شرسة.. قتلت منهم عدد كبير..
بصح المدفعية الصليبية دارت فتحات على الشط.. وقدر 4000 جندي فرنسي والكتيبة المالطية بال 1200 فارس ديالها.. باش يهبطو على شط جيجري..

فرسان الهيكل كانو لابسين الملاية البيضا المرصعة بالصليب لحمر.. هبطو جهة جامع " سيدي عمار'.. بجنب المقبرة.. دنسو الضريح المقدس.. وخزنو سلاحهم فيه..
الشي اللي استفز المشاعر نتاع الجواجلة المسلمين.. وفجر عندهم غضب كبير ..

الصليبيين قدرو يحتلو المدينة المخلية من سكانها.. وحطو الصليب وعلام فرنسا فوق منارة الجامع الكبير..
بصح الخيالة الجواجلة المدعومين من خوالهم القبايل ومن الانكشاريين اللي بعتهم اغا الحزاير شعبان.. علنو الجهاد المقدس ضد الصليبيين.. وماحبسوش هجماتهم.. وكانو يضربو فيهم.. وينصبولهم ف لفخاخ.. فالنهار وفالليل..

الدعم ماحبسش على الحملة من الاوروبيين.. الشيء اللي خلاها تحكم كثر من 03 شهور.. من جويلية حتى لأكتوبر 1664.. !

الطاعون تفشى في أوروبا مع خلاصت الصيف.. والدعم حبس على الحملة.. والحلفاء تخلاو على الفرنسيس.. والمجاهدين الجواجلة نجحو باش يحاصرو الصليبين التعبانين.. وهوشات كبيرة ناضت بين القادة الصليبيين..

سبحان الله.. قائد فرسان الهيكل من اللول كان حاب ينزل الحملة في بوجي بجاية اليوم.. وقالهم باللي جيجلي رايحة تكون لعنة على الصليبيين..

الملك 'لويس14' فهم هاذ الشي متوخر.. واعطى الاوامر باش تحبس الحملة في اول نوفمبر 1664.. الصليبيين انسحبو مذلولين.. وخلاو اسرى والمدفعية ديالهم في يد الجواجلة.. اللي انصرهم رب العالمين..

وهما راجعين لفرنسا، ومع انتشار وباء الطاعون.. الجنود المهزومين تقرر يتعزلو في جزيرة مهجورة قريبة من الساحل..
الملك المهزوم لويس 14 واللي كان يلقبوه ملك الشمس.. Roi soleil. حب يغطي الشمس بالغربال.. واعطى اوامر باش يغمو هاذ الفضيحة.. بصح الفضيحة زاد كملت.. وسفينة الدعم العجوزة "la lune- تقسمت على نصين.. وغرق معها 700 جندي وضابط بينهم الجنرال "Guillotiere" وهو من فرسان المعبد الصليبيين.. والجنود اللي سلكو خلاوهم يهلكو بالمرض والمجاعة في جزيرة المنسيين..

الفرنسيس.. حقدهم زاد على جيجل والجيجليين.. وكاحتلو المدينة عام 1839..ومع زلزال 1856.. جا انتقامهم لكبير.. هجرو الاهالي من المدينة القديمة.. وسماو الشوارع باسماء ضباط الحملة المهزومين Picardie.. Duquesne.. Guillotiere

بصح.. الزمان يدور.. والفرنسيس كما انهزمو وتهانو في اول نوفمبر 1664.. زادو انهزمو في اول نوفمبر 1954.. لجواجله ثاروا عليهم مع كل الجزايريين..

الجيش الفرانساوي.. سجل هذيك الحملة المشؤومة.. فالسجل ديالو.. كاول حملة ليه على الجزاير خرج منها ذليل..
وفالعيد الوطني ديالو.. عرض مركبات حربية في Champs Elysées.. كاتب عليها جيجلي 1664..

اليوم.. جيجل .. عروسة جزايرية.. زاهية فالبحر المتوسط.. تقابل في مرسيليا.. من بعيد..
شوارعها مرصعة باسما الشهدا المسلمين.. العربي بن مهيدي لطفي عميروش شابي رويبح بوبزاري بوالنار بوريدح والاخوة شيكيرين.. بن باديس الامير عبدالقادر اول نوفمبر وجيش التحرير.. 🇩🇿🇩🇿

بقلم وصوت الباحث / زغاد نصرالدين.. فضلا.. ادعموا صفحتي.. سيروا في الارض