مكسبي يامسندي حفظ العبادة
والدروب الكايدة حدرة وطاتي
خوتي للذيب ماتطلب شهادة
وأنت ياذيب الفيافي صرت ذاتي

أنت يابن عبيد شيخٍ سيد سادة
قرم وابن اقروم ياعز اللجاتي
أنتم أهل الشور يانعم الإفادة
مكرمين الضيف حيل مبركاتي

وش على العقبان من دبي الجرادة
مايروع الذيب من ترع النباتي
والبهم عرض الغنم يعتاش زاده
والعصا في يد راعيها سواتي

بعض نبت الأرض مايدفي رماده
هـش لو إنه جموع محزماتي
وبعض نبت الأرض يستوجب حصاده
يحرص الفلاح في حـشّـه بتاتي

كل فارس لي تعثر به جواده
مايخونه ساعده ضد العداتي
والردي قرب له فراش ووسادة
مايشب الضو في ليله يباتي

صبينا صبيٍ عزومي في جهاده
صبينا فكاك ترفات البناتي
صبينا وقت اللقاء يقدح زناده
لاد زايد مطعمين الجايعاتي

طيرنا قرناس لاتخشى زهاده
طيرنا وقت الهدد طلعه ثباتي