‪#‎Gawai‬ Panggau Tuah Raja
Sebengkah ari gawai ka jarang diintu bala kitai. Gawai tuah bisi tiga iti jenis ianya

1.Gawai panggau tuah raja

2.Gawai nama ka tuah

enggau kepenudi ianya

3.Nimang tuah.

Gawai tuah ka pemadu besai ianya Gawai Panggau Tuah Raja. Gawai tu diintu kena orang ka ngempu pengawa ngintu ruang bilik sida ke bisi utai nyelai nyadi. pia mega gawai tu diintu ngambi ka ruang bilik orang ka ngempu pengawa tau bulih tuah, bulih limpah, mudah bulih duit,bulih ringgit, bulih padi, bulih puli, bulih reta, bulih tengkira, bulih setawak, bulih menganak, ngambi ka orang ka ngempu pengawa tampak nama jelai rita, nuchong baka bukit rabong menoa, tinggi baka langit nungkat neraja, terang baka pandang bulan purnama.

Orang ka gawa ngintu gawai tu kemari ianya endun Christina Susie anak Pulene ba rumah Kesulai nangga ayam sungai poi kanowit. gawai tu diintu ngau chukup piring chukup ading. gawai tu nyadi kena ka 2hb 6.2016 nyentuk ka pagi 3hb 6.2016. tang sebedau pengawa tu nyadi dia bala sida serumah bisi baum bakani ka atur jalai pengawa. 2 minggu sebedau gawai nyadi alai bala orang dirumah panjai sama bela manduk asi pulut ngena ruas lalu ngaga tuak. Udah nya orang ka ngempu pengawa lalu ngemai bala bukai ba rumah panjai nurun deka nebang kayu pelai ka dikena ngaga panggau. Nyadi sida ka nurun nebang kayu pelai ba kampung tu disereta ka enggau piring lapan lalu dipangkung ka tawak enggau bebendai kena nejal pending enggai ka ningga bunyi burung ka enda manah. udah tembu kayu disayat nyadi ka papan, iya dibai niki ke rumah sereta diiring ngena pangkung tawak enggau bebendai.