【放生感應奇蹟記】〖道證法師台語慈悲講述〗01：緣起。念佛放生．捨報安詳


　◎念佛放生．捨報安詳◎　上慧下年法師／板橋

　　念佛放生．頂現祥光
　　容光如常．含笑示寂
　　體發溢香．滿室芬芳
　　生死交會．輕安自在

．．．🪷· · • • • ✤ • • • · ·🪷．．．

00:00
　　因為性命是無價之寶，所以放生救一條命的價值、功德，嘛是無法度好估價的。下面，咱所欲講的是放生感應真實的代誌。遮的故事紀錄佇最近出版《放生感應奇蹟記》這本冊內面。這本冊是水里上圓下因老法師領導大眾放生十外年當中，所發生的種種奇蹟。以及時常放生的諸位菩薩，親身的體驗和心得。

　　為什物冊名叫做「感應」呢？「感」親像種作，「應」親像收成的花果。因為看著眾生有性命危險的痛苦，交換角色，將心比心，生起憐憫體貼的感覺，發慈悲心欲救度伊。有這種的「感」，就和佛菩薩的心仝款；和佛菩薩的心仝款，頻率一相通，就有「應」，所以叫做「感應」。若長期保持這種的心行，就和阿彌陀佛，清淨平等覺相應。負責編輯這本冊的菩薩，是末學母校中國醫藥學院的校友，許明德醫師、許玲燕這對夫婦。怹和一位陳居士來找末學，希望將這本冊的內容翻作臺語，講予逐家聽。因為末學一向真尊敬上圓下因老法師的修持，伊以九十幾歲的高齡，閣無惜辛苦，每个月領導大眾爬山入海去放生；嘛真感動跟隨老法師，長期忍苦、忍辱去放生諸位菩薩的精神。所以雖然末學只會曉講真淺白、簡單的臺語，嘛真歡喜學習，來講怹的故事。希望逐家攏會當體會放生真正的精神和意義，共同發起咱同體大悲的佛心。用慈悲的佛心，才會當感應種種吉祥的福報，消除各種的災難，才會當感應佛的淨土。

　　最近時常聽人講社會景氣無好，其實社會的景氣，介在咱人的心。人的心念若是好，若是善良，發出來的氣氛自然好，逐家氣氛好，景氣才會好；大眾的心若是愛殺生，愛鬥爭，氣氛一定無好，人的心發出來的氣氛若無好，景氣一定袂好，甚至殺氣騰騰，惡氣沖天，就會和凶神惡煞相應，當然就感招來災難。放生是放眾生一條自由的生路，嘛是放咱內心的慈悲生起來。咱人若會當慈悲放生，自然感應一片吉祥的生機，就是有災難，嘛會被放生。

　　一个國王或者總統，會感覺伊家己的性命真寶貴；咱一个老百姓，嘛是會感覺咱家己的性命真寶貴。仝這个道理，咱人類感覺家己的性命真寶貴，一隻狗蟻、一尾魚，嘛會感覺伊家己的性命真寶貴。佇佛的眼中，一切眾生的性命，攏平等、仝款寶貴。咱救一个人，諸佛歡喜；咱救一隻狗蟻，佛嘛仝款歡喜。

05:44
　　下面咱欲介紹一位上慧下年法師的故事。佇遮咱先補充做一个解說，咱稱呼上慧下年法師，是因為尊重，毋敢直接叫師父的名，所以加「上、下」這兩字。意思就是，伊的名有兩字，上面彼字是「慧」，下面彼字是「年」，並毋是講伊的名總共有四字。年是延年益壽彼字年，也就是過新年的年，佇遮讀作年。

　　以前，板橋一言精舍的住持，是上慧下年法師，伊的俗家世代是漢醫，伊出家以前，嘛有研究醫學。伊少年的時，曾經去日本留學，成績真好，日本人真讚歎伊。伊可以講是智慧超群，而且榮華富貴，家庭方面也攏一帆風順，是社會上逐家攏真欣羨，幸福閣得意的人。

　　但是，好花無定定開，好景不常在，伊佇民國四十六年的時，著著胃癌。因為胃癌的關係，去佛寺靜養，佛寺的住持就勸伊放生。伊忽然間體悟著，性命只是佇呼吸之間而已。一口氣歕出去，若欶袂倒轉來，就是後世人矣。世間的一切，財富地位，就親像夢中的境，留袂牢；嘛親像空中的花，掠袂著。夫妻感情雖然好，嘛無法度久長恩愛。像家己得著胃癌，太太囝兒閣較好，嘛無可能代替家己去死，生死關頭總是愛家己行。無論按怎有錢、有勢的人，面對著死亡，嘛是愛一切攏放下。放會下，嘛愛放；放袂下，嘛愛放。放會下就較輕鬆自在；放袂下就加一重毋願的痛苦，除了較艱苦，嘛袂得到什物。若是早一工放下，就早一工自在、快樂。放下不但袂失去什物，顛倒會活了較輕鬆、較久長。所以伊就發心出家修行，專門修念佛法門，而且弘揚放生。結果伊雖然有胃癌，卻閣活了三十七年，到七十七歲時，才安然、自在去西方極樂世界。而且伊往生的時，逐家為伊念佛，鼻著伊的身軀發出一陣陣真特殊的芳味，所有的蠓蟲胡蠅攏尊敬伊，自動閃避、遠離。伊火化以後，嘛有真濟舍利子。這是伊一世人念佛、放生，不可思議的感應。

　　伊由真富貴的生活出家，但是出家以後，攏隨大眾，過著真簡單、樸素的生活。食物件嘛真簡單，攏毋肯私下食較好的菜。伊持戒真嚴，一心向佛。所有善男信女供養伊的錢財，伊攏全部放生，毋捌留咧家己用。民國七十年左右，伊就利用電視來講經弘法，勸人戒殺、放生、食素食。上慧下年法師，伊對放生的小動物真慈悲，不但救怹的身軀，而且嘛為怹皈依，講佛法、念佛，滋養怹的法身慧命。伊數十年如一日，攏按呢實行。有一遍佇放生的法會，弟子翕相留念，彼个相片洗出來，發見法師背後，以及頭殼頂攏放光，而且光明射入去到雲頂。眾人看了以後，攏真讚歎，講師父放生，竟然放甲身軀攏放光，不可思議。但是法師知影以後，就將彼个相片，攏總藏起來，毋予人宣傳，一直到伊往生以後，相片才閣予人揣出來。自古以來，大德修行攏是像按呢，老實佇心地用功，佇佛法用功。伊平常時常提醒大眾，人毋但頭愛有目睭，跤嘛愛有目睭；愛會曉看，嘛愛會曉行。勉勵人菩提道上，愛依教奉行。不管什物人問伊什物問題，伊攏真耐心回答人，慈悲平等，攝化一切，所以皈依的弟子，有七、八千人。

13:25
　　胃癌在醫學上，是一个困難的題目，就是用總財產，請全世界上高明的醫師來治療，除了要受開刀、電療、化學治療的苦以外，嘛未必可以有像法師念佛、放生遮爾好的結果。上慧下年法師，伊善用佛法修行，用放生修仁慈的心。心地的因若是改變，果自然就會改變；因若好，果就好。伊平常種放生念佛的因，果報自然是健康、長歲壽，閣會成佛。世間人攏只是希望果報會當好，卻無了解因果報應的道理。如果無由心地的因來下手，當然達不到希望。若是了解因果的道理，由因來做起，就可以得到好的結果。


　🔅．．．· · • • • ✤ • • • · ·．．．🔅

蕅益大師《靈峰宗論．卷第六之三．惠應寺放生蓮社序》

殺生卽殺自心未來諸佛。放生卽放自心未來諸佛。若放自心未來諸佛。卽真念佛三昧。修此念佛三昧。是恆轉妙法華經。百千萬億部也。


蕅益大師《靈峰宗論．卷第六之三．放生社序》

轉劫濁成淨土。術莫妙於放生。放生一法。唯擴與久。一杯水不救車薪火。設人各一杯焉。一杯不已。再一杯焉。杯水多。車火未有不滅者。今殺運紛紛。並同分惡業招感。非慈三昧水。孰能熄之。

　　🪷· · • • • ✤ • • • · ·🪷

《妙法蓮華經．化城喻品第七》

　願以此功德．普及於一切
　我等與眾生．皆共成佛道

• ───── ✾ ───── •
　　　南無阿彌陀佛
• ───── ✾ ───── •

#圓因師父 #放生感應奇蹟記 #道證法師