Published On Sep 2, 2009
Dall' LP 11 mesi e 29 giorni (1977) della NCCP.
Giuvannenie' Giuvanne
guagliunciello 'e sei sett' anne
mamma toja tene che ffa'
sette figlie adda campa'
pirciò 'a scola te vo' mannà
Ma rint' a chesta scola
nun te 'mpare ddoje parole
dice ca nun saje parla'
ca pirciò t' avisse 'a scurda'
comme parla mammà e papà
Giuvannenie' Giuvanne
già tiene a mente
ce sta chi parla bbuono
e chi malamente....
Pirciò Giuvanneniello
'sta scola 'a lascia
ca po' parlà chi tene 'a mangiatora vascia
Giuvannenie' Giuvanne
'mmiez' 'a via a sett' ott' anne
unu ggioco lle piace 'e fa'
isso corre annanze e va
e 'n 'ato arreto l' adda acchiappa'...
'Stu ggioco 'int' 'o quartiere
'o fa sempe cu 'o brigadiere
quanno chisto l' ha 'ncappato
'o secuta pure 'o pate
ca 'o culleggio l' ha priparato...
Giuvannenie' Giuvanne
mo hanno saputo
ca pure d' 'o culleggio te ne sì fujuto...
Però Giuvanneniello
miette 'o pensiero
e da dimane va facenno 'nu mestiere
Nov' anne è unu mestiere
'o guaglione addu 'o barbiere
'na semmana he 'a fatica'
ma quatto sorde te vonno da'
e 'o mazzo tanto te fanno fa'...
'N 'atu mestiere 'o 'ngarre
'o guaglion' 'e rint' 'o bar
curre cu 'a guantiera 'e tazze
si nun curre ognuno se 'ncazza
e te pavano 'a sputazza...
Giuvannenie' Giuvanne
sott' acqua e viento
se spogna 'sta fatica e nun guaragne niente
Pirciò si cagna ancora
'n 'atu mestiere
s' 'o 'mpara cu 'e cumpagn' 'e 'ncopp' 'e Filangiere
Mo ferm' a 'na signora
Neh signo' sapite ll' ora? -
Chella guarda 'a part' 'e llà
'nu zumpo 'a borza 'a puo' sceppà
fujenno primma ca pò sciata'...
Sceppanno t' arrevota
fuje 'ncopp' a 'sti ddoi' rote
isso arreto 'n 'ato annanze
songo scippe fatt' 'e lanze
nun ce sta cchiù chi se scanza
Giuvannenie' Giuvanne
ma 'o munno aspetta
e vene 'o juorno ca t' 'e mette 'sti manette...
Giuvanneniell' 'o ddice
pure 'o ggiurnale
'sta corza l' he fernuta mo a Puceriale
Giuvannenie' Giuvanne
rint' 'a cella a ssirece anne
nun appena ca è arrivato
te l' abboffano 'e mazzate,
pe' sapé cu chi è assuciato...
E allora dint' 'o scuro
se da 'a capa rint' 'o muro
corre 'a guardia e 'o piglia 'e pietto
Chisto è pazzo o fa 'e dispiette! -
e l' attacca 'ncopp' 'o lietto...
Giuvannenie' Giuvanne
no nun è pazzo
si trase 'o manicomio è malatia 'e razza
'Na razza 'e guagliuncielle
tutt' 'e sirice anne
ca a Napule se chiammano comm' a Giuvanne...
'Na razza 'e guagliuncielle
tutt' 'e sirice anne
chiammate tuttuquante propeto Giuvanne...