❤️❣️ जै गोर जै मरीयामा जै सेवालाल ❣️❤️


welcome my youtube channel sonu banjara song

banjara teej album 2021 by gor mahi present


geetkar
gor kavi rahul narayan bhukiya dhulapur
singer
lukesh rathod amla gokul jadhao kasola



Recording studio
Gor Mahi Asola
mo.8975121801



🌾🌾 तीजेर तेवारे लार कायी जपमेलोच 🌾🌾

गोरमाठीर तीजेर तेवार यी यीसवीसन पूरव ८००० ते ५००० वरस आंगाडीयाती चलो आरोच. कातो तीजेर तेवारेम येक गीद बोलेम आवच आण वू गीद आशो छ क.

1) कूणसे देशेती आयीये सोनकी,
मोवना रो दळ भीजेगो ये,
मेरगडेती आययी सोनकी,
मोवना रो दळ भीजेगो ये,

कूणशो सोजा लायीये सोनकी,
मोवना रो दळ भीजेगो ये,
तीजेरो सोजा लायीये सोनकी,
मोवना रो दळ भीजेगो ये,

यी गिद सिंधू संसकृरूती मायीर मोवना नगरीर वूलेख करच. यीच गिद जे आजेर घडीन बलुचिस्थान येमायीर मेरगडेर संस्कृतीर वूलेख करच.

आन पच सांज पडी तिज पेरायर ठर जाव पच छोरीय तिसरेक पोर मकोडार धुड लेयेन जाव आन जातु जातु वो गिद बोलच क

2) मकोडा धुड काडो जलदीश रे,
मकोडा तारी सातण आयी रे,
मकोडा धुड काडो जलदीश रे,

आन पच धुड लाव आन पच सेज जेर जेर घरेर घंवू थोडा थोडा गाळतीती. आन पच नायक नायकण तांडेर पंच बलाव आन पच सांज पडी तीज पेराव. पण तिज पेरायर आंगाडीया याडी येक गीद बोलतीती.

3) म वोलडी मंगायी हडपाती,
म धूंडे मंगायी सींधू घाटीती,
म घंवू मंगायी मोवना नगरीती,
म पाणी मंगायी सींधू नदीती,
म झूलर बलायी घणे हूसेती,

आसे तराती गिदेप रमती रमन हामार याडी भेन वो गिदे मायीन घंवु यी आनाज कतराक जुनो छ येरो शोध सिंध्दु संस्कृतीम लागोच. यी वात जतातीती आन पच तीज पेरेर टेमेन तीजेम घंवू पडेर बाद याडी आजीक येक गीद बोली.

4) कूण पेरायो तीज ये घंवूला डेडरीया,
नायक बापू पेरायो तीज घंवूला डेडरीया,
कूण पेरायो तीज ये घंवूला डेडरीया,
नायकण याडी पेरायी तीज ये घंवूला डेडरीया,

5) वड फुंदी मारे मोवनारे देश,
वड फुंदी मारे मोवनारे देश,
मारे मोवनारी खबर लियाये फुंदी,
वड फुंदीये कायी रंग लेरी,

वड फुंदी मारे हड्डपारे देश,
वड फुंदी मारे हड्डपारे देश,
मारे हड्डपारी खबर लियाये फुंदी,
वड फुंदीये कायी रंग लेरी,


आसे परकारेती तीज पेरद आन वो तीजेन आपणे बालबच्या वांगर देकभाल कर. पच वोन नव दाड रोज सांज परभाती कूंवारी छोरी पाणी नाकेन जाव आन जातु जातु छोरी गिद बोल क.

6) जोगीतो आयोये सातणुरे तांडेम,
ओन दिजो धोबेकी जार जोगी वाटे चालो,
ओन पुचु बापेरी खबर याडीरी खबर जोगी वाटे चालो,
जोगीतो आयोये सातणुरे तांडेम,
ओन दिजो धोबेकी जार जोगी वाटे चालो,
ओन पुचु नायकेरी खबर नायकणेरी खबर जोगी वाटे चालो,

आसे प्रकारेर नाळी नाळी गिद बोलन छोयीय पाणी नाकेन जाव आन पच पाणी नाकतु नाकतु सदा येक गिद बोल क.

7) घंवूलाप रोसला ये मारी लाडो ये बायी,
चुंगला रळजाये ओरो राहुल विरेंळा,
घंवूलाप रोसला ये मारी लाडो ये बायी,
चुंगला रळजाये ओरो राहुल विरेंळा,


8) सातळो पीळीय पीलोणेरी वेल ये,
सातणो काका बाबारी दोयी भेनये,
सातणो येके लूंगेन दोयी खायाये,
सातणो काळ पडीय भमजायाये,
सातमो सकाळ पडीय मलजायाये,

9) कागला सोनो पीतळ तारो देश रे,
कागला वुचीसी हावेलीम रेस रे,
कागला याडी बापुन मत केस रे,
कागला तरी बेटीन वनवाश रे,



10) तु आवरी, तु गवरी,
तु चंदणेर पिढीया बेसरी,
तु नाचरी, तु कुदरी
जातेरो बेटा ठटा करे,
जातेरी बेटी मस्करी करे,
तु आजरीया पेर,
तु बाजरीया पेर,
सुंवांशे बोल सारेंगी बोल,


11) मारे विर सरीको विर पीडीया देदर,
तोन तांडेरो नायक बनावुरे विर पिडीया देदर,
तोन गामेरो पटलीया बनावुरे विर पिडीया देदर,

मारे भेनेसरीकी भेन पीडीया लेलय,
मारे भेनेसरीकी भेन पीडीया लेलय,

मारे विर सरीको विर पीडीया देदर,
तोन तांडेरो नायक बनावुरे विर पिडीया देदर,*
तोन गामेरो पटलीया बनावुरे विर पिडीया देदर,

मारे भेनेसरीकी भेन पीडीया लेलय,
मारे भेनेसरीकी भेन पीडीया लेलय,


12) बोरडीरे बोर खाटे मिठे बोर,
तम लाग जाव जो तम झड जाओ रे,
कनु न कनीया चरमटडी,
काई चाळो लगायी ये चरमटडी,
वो नायकेरे खीसीयाम चरमटडी,



13) लियु लियु ये बापूरो नाम जेरे पच तोडीयु तिज,
बापु दिय ये आसासो जेरे पच बोलीवु गीद,
लियु लियु ये याडी रो नाम जेरे पच तोडीयु तिज,
याडी दिय ये आसासो जेरे पच तोडी यु तिज,



15) मारो चलोकडीरो डोना,
जुवाळेती कोणी खोसाय मारो डोना,
मारो चलोकडीरो डोना,
राहुलेती कोणी खोसाय मारो डोना,


15) वेगी कायी सातणो मनेरी हुश,
आडो हटकीया वूभोच ये
जरासेकी रेगी सातणो मनेरी हुश,
आडो हटकीया हुबोच ये,
कोणी वी सातढो मनेरी हुश
आडो हटकी हुबोच ये



पाणीभ उपज, पाणीम निपज, पाणीम समाजाव
येर आरत क छोर पच आंग जाव

हानु केन छोरीन आडा लच पच छोरी वो साक्तरेन सोडान वोर वूतर दच. नूण पच छोरीय आंगेर वाटेन निकळच आन आंघ नदीप जान तिज वेरादच आन पच जे पिडीयार रमतीम जे जितच वोर पग धोन हारेवाळेन पाणी पिळूं लागच आन पच वतच गोरूर तिज तेवार खतम वेजावच......🙏🙏

यी तीजे लारेर कारण म मार लकणीर माध्यमे मायीती थोडसेकेम मांडेर प्रयत्न कीदोचू. यिच खरो वेणु करण मारो केणु छेयी पण मार चिंतण मतण डाव लोकु कनेती मळी वो मायीतीर आधारेप यी म लकोचु. आन मार लकणी लकण म थांबूचू.....जै गोर जै सेवालाल

🥀🥀🥀🥀🥀🥀🥀🥀🥀🥀🥀
से गोर भायीन तिजेर तेवारेर हिवडेर गाठेकनेती घणी घणी सेवा सायीच्छा
🥀🥀🥀🥀🥀🥀🥀🥀🥀🥀🥀

                ✍ लकेवाळो ✍
             गोर रावूल नारायण भूकीया
गोर साहित्यीक दळ अमरावती विभागीय संयोजक
       तांडो धूळापूर ता. दारवा जी. यवतमाळ
              मो. न. :- 7776021066


#banjarateejalbum2021
#gormahi
#mahibanjarasong
#sonubanjarasong
#lukeshrathodamla
#gokuljadhaokasola
#gorkavirahulbhukiya