Published On Oct 24, 2021
गोवर्धन पूजा के पद
(कार्तिक कृष्ण 1 से गोवर्धन पूजा तक)
(कीर्तन प्रणालिका अनुसार)
1. मंगला दर्शन ( राग - बिलावल )
गोकुल कौ कुलदेवता प्यारौ गिरिधरलाल
कमल नयन घन साँवरौ वपु बाहु विशाल
वेग करौ मेरे कहें पकवान रसाल
बल मघवा बलि लेत हैं करकर घृत गाल
इनके दीये बाढिहें गैया बच्छ ग्वाल
संग मिल भोजन करत हैं जैसें पशुपाल
गिरि गोवर्द्धन सेइयें जीवन गोपाल
सूर सदां डरपत रहें जातें यमकाल
2. श्रृंगार दर्शन ( राग - बिलावल )
पूजा विधि गिरिराज की नंदलाल बतावें
झुण्डन झुण्डन गोपिका मिल मंगल गावें
गंगाजल सों न्हवाय कें दूध धौरी कौ नावें
विविध वसन पहराय कें चन्दन चरचावें
धूप दीप कर आरतौ बहु भोग धरावें
तिलक कियौ बीरा दियौ माला पहरावें
खिरक चले लौहरे बड़े मिलि गाय खिलावें
फिरि गिरिधर भोजन कियौ सुख सूर दिखावें
3. राजभोग दर्शन ( राग - सारंग )
बडडेन कों आगें दै गिरिधर श्रीगोवर्धन पूजन आवत
मानसीगंगा जल न्हवाय कें पाछें दूध धौरी कौ नावत
बहोरि पखार अरगजा चरचित धूप दीप बहु भोग धरावत
दै बीरा आरती करत हैं ब्रजभामिन मिल मंगल गावत
टेर ग्वाल भाजन भर दै कें पीठ थाप सिर पेंच बँधावत
चतुर्भुज प्रभु गिरिधर अब यह ब्रज युगयुग राज करौ मन भावत
4. उत्थापन दर्शन ( राग - नट )
हमारौ कान्ह कहै सोई कीजै
आवौ सिमट सकल ब्रजवासी पर्वत कों बलि दीजै
मधुमेवा पकवान मिठाई षटरस व्यंजन लीजै
आसकरण प्रभु मोहन नागर पन्यौ पछावर पीजै
5. भोग-संध्यारती ( राग - गौरी )
श्याम कहत पूजा गिरि मानी
जो तुम भाव भक्ति सों अरप्यौ देवराज सब जानी
तुम देखत भोजन सब कीनौ अब तुम मोहि पत्याने
बड़ौ देव गिरिराज गोवर्धन इनहि रहौ तुम माने
सेवा भली करी तुम मेरी देव कही यह बानी
सूर नंद मुख चुम्बत हरि कों यह पूजा तुम ठानी
6. शयन दर्शन ( राग - कान्हरौ )
हँस हँस बात कहत मनमोहन हमारौ देव गोवर्धनराई
जाके आसरे हम गौ चारें सुरपति कहा आवै जाई
नित उठ खेलन हम पै आवै मांग लेत पकवान मिठाई
जाके चरण प्रताप तेज तें रहत सदां सुखदाई
अखिल लोक कौ नाथ कहावै शिव विरंचि जाकी करत बड़ाई
सूरश्याम यों कहत सबन सोन गोवर्धन की करौ पुजाई
डॉ भगवान दास कीर्तनकार, कामवन
(अष्टछाप के श्रीगोविंदस्वामीजी के वंशज)
ડૉ ભગવાન દાસ કીર્તનકાર, કામવન
(અષ્ટછાપ કે શ્રીગોવિંદસ્વામીજી કે વંશજ)
सम्पर्क 9828737151
#keertan
#hawelisangeet
#bhagwan_das_keertankar
#govardhan
#goverdhanpoojakepad
#goverdhanpuja
#giriraj
#pooja
#pranalika
#mangala
#nityaseva
#nityakram
#seva
#rag_bilaval
#keertan pranalika
#sandhyarati
#utthapan
#vallabh
#pushtimarg
#pushtimargkeertan
#pushtikirtan
#keertan
#nityaseva_keertan
#mahaprabhu
#kirtan
#shayan
#havelisangeet
#pushtimarg_pad
#srigokulenduprabhu
#keertanbhajan
#keertankeertan
#keertanvideo
#keertansong
#gauri
#keertanpranalika
#nityasevakeertan