ياعلي ونيت
شعر معالي الدكتور مانع بن سعيد العتيبة
الحان : من التراث
غناء : رجب عبدالله

يا علي ونيت من عوق جديمي
ونة المطعون في قاصي حشاه

وين لي مثلك أنا القولي فهيمي
يسعف المنصاب من عوق بلاه

سالبني راعي النهد الزميمي
افزر لي من تمشي باخيلاه

والعيان السود لي فيها أهيمي
صوبتني من ورى رضف الغشاه

وان تبسم اظهر اللولو النظيمي
من قراح الماي ارواه او سقاه

والخصر هايف او منحوف البريمي
والجسم سبحان ربي لي بناه

ما حلاته لي مشى فوق الأديمي
مشية الي ما تعيل في خطاه

لو دعالي ميت او عظمه رميمي
نش من قبره او ردت له الحياه

وان نزل في دار محيل اوهشيمي
امطرت لمزون لين اروت ثراه

واندرت صحراه جنات نعيمي
بين عشبٍ أخضر اوغدر اومياه

يا علي خلي انا شكله عديمي
خشف ريم تايه وسط الفلاه

ساكن ما بين ريضان او زميمي
او منزله في وسط قلبي جد بناه

بالشفاقة انتظر شوفه نديمي
في مكان لا حسود او لا وشاه

اشهد اني صرت في حبه غريمي
ماليه عن وصل محبوبي عزاه