🏺 حمام النبي سليمان.. حمام ملوان : نبع الطبيعة العذرا اللي يخفي اسرار .. 🍯

بقلم وصوت/ زغاد نصرالدين
فضلا.. ادعموا صفحتي سيروا في الأرض sirou fi el ard

الحمام ماشي غير طهارة.. نظافة ونقا.. الحمام تاريخ ثقافة بركة وعلاج.. !!
ينابيع حارة تجري من زمان.. سبيطار طبيعي.. يداوي النفوس ولبدان.. !!

فيها معتقدات واسرار.. الناس تقصدها من بكري باش ترتاح.. والطبا ينصحو بيها.. هدية ورحمة من عند الاله..

الداي حسين.. اخر دايات الجزاير.. بنتو ملوانة.. تقاست بمرض خطير.. شلها وشوهلها لون بشرتها.. وطيحها فالفراش..
الطبا ماقدروش يعالجوها.. والداي دبرو عليه باش يديها جيهة جبال الاطلس البليدي.. وين كاين واد وعين حامية.. مشهورة.. يسموها حمام سيدي سليمان.. حمام عتيق.. حكايتو حكاية.. معروف عند الناس.. من وقت النبي سليمان..

وراحت ملوانة وتحممت وبرات من الشلل ورجعلها وجها الحسن.. والحمام تسمى على اسمها.. وولى اسمه.. حمام ملوان..

الداي قرر يكرم هاذ العين العتيقة.. عوينة البركة.. وبنى فيها صهريج العروس.. وبنى عليها قبة النبي سليمان..

الاسطورة تقول باللي النبي سليمان قرر يدير جولة فالعالم.. وابعث عمالو من الجان يكتشفولو البلدان ويبينولو حمامات فالطريق باش يرتاح.. وكان منها هاذ الحمام.. وبالحكمة ديالو.. ادى معاه في هاذ الرحلة جان صمه بكمه وعميان باش ما تعرفش سر الحمام.. ومات النبي سليمان ومات سره معاه..

حمام سيدي سليمان والا حمام ملوان.. شرق البليدة وجنوب العاصمة.. ولى معجزة واسرار.. والناس ولات تقصدو من كل مكان.. وبالخصوص النسا والبنات.. يقصدوه بالزغاريت .. بالشموع والحنا.. باش يصفيو البشرة.. يداويو العقم.. ويفكو العطلات وتلباس الجان.. وكله باذن الرحمان..

حمام ملوان.. مقصود بزاف من العاصميين.. ومعروف باللي يشفي لمراض.. يعالج البشرة المفاصل و العظام.. الما ديالو فيها عناصر معدنية.. كبريت كلور وصوديوم و املاح.. والملوحة ديالو قريبة لملوحة نتاع البحر.. وهاذ الشيء يخليه يحمي من لسقام..

فالطريق.. النفسية تطيب.. ولعصاب تركح و ترتاح.. مناظر طبيعية ساحرة.. جبال ووديان.. يتلاقاو فبها واد الشريعة العذب البارد مع ما سيدي سليمان المالح الحار..

في وقت السخانة.. الوادي الهابط من جبال الشريعة.. يولي مكة للعايلات اللي تحب الاستجمام.. لولاد والنسا يعومو.. ناصبين خيمات صغيرة بجنب الواد..

على حافة الطريق اللي توصل للوادي.. والحمام.. تشوف اللي يبيعو الأدوات التقليدية كما الدربوكة والزي التقليدي نتاع لجداد.. وراح تذوق المنتوج الاصيل نتاع لجبال... يدورو بيك الذراري اللي يبيعو المطلوع.. وما تقدرش تقاوم لجبان التقليدية وحتى الحشاوش والفاكية ولعشاب ..

بقلم وصوت / زغاد نصرالدين
حمام ملوان.. الجمعة / 06 ماي 2022..

فضلا.. ادعموا صفحتي سيروا في الارض