Syai Pemilukada

Syair :Medya Hus
Vocal : Medya Hus,
Produksi : MD Channel
Copyright @2024

Syair ini tentang Pemilukada yang sudah dekat dilaksanakan di berbagai daerah di negara kita,
didalam syair ini mengajak kita semua bijak dalam Mengikuti pemilu, semoga berjalan Aman dan sukses,

Simak Syairnya salam mulia kami
Medya Hus MD Channel

PEMILUKADA
Syair : Medya Hus

Di dalam uteuen ureueng theun ubèe
Di yup bak kayèe na cangguek meusu
Na bacut haba lôn rika ratèe
Jinoë meu teuntèe tentang pemilu

Bak masa jinoë di tanyoë teuntèe
Cit rap trôk watèe barat ngon timu
Pemilukada haba ka meuthèe
Ureueng duek ulèe bak Nomor Satu,

Rata jeut sagoë jinoë deuh lagèe
Gamba meu teuntèe rata penjuru
Baliho bacalon takalon lagèe
Diyup bak kayèe jak pasang laju,

Rata peureuté oké pèh palèe
Tapi meu teuntèe mantong lam sapu
Suai pasangan nyan kadang goh thèe
Na cit meu teuntèe jak umum laju,

Na independen ladôm sôk bajèe
Bak rakan sampèe dukungan maju
Parnas ngon parlok jak keutok palèe
Meudilèe-dilèe jak calon laju

Mulai gubernur dum ka deuh bajèe
Rupa tan reudèe cit gléh tan sapu
Dan wali kota ka deuh meusilèe
Bacalon teuntèe geutuléh laju,

Bacalon bupati meuriti teuntèe
Hana lé padèe barat ngon timu,
Katrôn ugampông langsông peureulèe
Dukungan lakèe bak ayah Ibu,

Silaturrahmi jeut si meu teuntèe
Hana lé malèe jak peugah laju
Mita dukungan saban peureulèe
Bak warèh sampèe Ulama Teungku,

Meumacam cara jak mita lagèe
Öh ka peureulèe kajak jôk susu
Jak jôk bantuan pakaiyan bajèe
Meunan keuh lagèe rap toë pemilu

Ban mandum tanyoë jinoë bèk seudèe
Bèk peugot ratèe hana got laku
Piléh pemimpin tangieng jroh ulèe
Bèk jeut keumalèe öh lheuh pemilu

Kandidat ngon timses beu bèrèh ulèe
Bèk jak teumipèe barat ngon timu
Tapeugah visi misi lom teuntèe
Bèk nyang keulabèe lam sapu-sapu,

Rakyat ka carong tan ngong lé ulèe
Turi ie teubèe turi ie susu
Turi nyang trang tuban nyang reudèe
Turi boh jambèe turi boh kulu

Nyang peunténg that-that meuhat e sampèe
Beu cerdas ulèe ikôt pemulu
Bèk bak memiléh habéh dum seudèe
Ayah meulintèe ta peugot karu

Limong thon sigo tanyoë meu teuntèe
Lheuh nyan ka lagèe biasa laju,
Soe nyang teupiléh keudéh duek ulèe
Tanyoë dum teuntèe tadukông laju,

Kanibak Allah dô'a jeut watèe
Beujroh meu teuntèe bèk karu-karu
Aman ngon tentram meunan talakèe
Bèk na nyang reudèe watèe Pemilu,

Pengarang : Medya Hus